Við Íslendingar njótum sumarsins sjálfsagt betur en þær þjóðir sem telja gott veður sjálfgefið. Nú um hásumar er öllum tíðrætt um gott veður og langa sólardaga. Á suðvesturhorninu vill þetta þó oft fara á ýmsan veg en engu að síður er gott þegar góðir dagar koma. Við förum þá í kvöldgöngur, röltum um Elliðarárdalinn og Heiðmörk og njótum þess að lifa í yndislegu landi.
Á þessum sumardögum gerum við allt til að lengja daginn. Að sið Miðjarðarhafsbúa setjum við saman kvöldverðarboð, við grillum, fáum okkur drykk og njótum dagsins fram á nótt. Á slíkum kvöldum finnst mér gott að fá mér Sangriu.

Sangria allan sólarhringinn
Sangria er upprunnin í Andalúsíu sem hýsir m.a. þekkta ferðamannastaði okkar Íslendinga s.s Costa del Sol. Andalúsíubúar og reyndar Spánverjar allir sötra ekki bara á Sangriu á kvöldin heldur njóta þeir hennar allan daginn. Uppskriftir eru misjafnar og fer þá allt eftir því hvaða tími dags er. Í hádeginu er hún létt, eins og flestir Íslendingar þekkja hana, rauðvín þynnt út með gosdrykk sem hér á landi myndi vera Sprite eða 7-up. Sangria á sér þó eldri hefðir og er í raun gæðadrykkur þegar kvöldar.

Upphaflega samsett úr vínafgöngum
Sangria er upprunalega sambland afganga af barnum, ýmsar sterkvínstegundir eru settar saman við rauðvín og blandan svo þynnt út með gosi. Ávaxtalíkjörar eru sérstaklega vinsælir.
Góðri Sangriu ber að bera virðingu fyrir. Hún er hvort tveggja í senn frábær samsetning og rammáfeng því rauðvín og gos er aðeins grunnurinn að góðum drykk. Á vissan hátt mætti líkja því saman hvernig Sangria er löguð við að velja sér gott kaffi. Á morgnana viljum við sterkt og gott, seinnipartinn fáum við okkur Cappuchino en á kvöldin vijum við rjómakaffi og góðan líkjör með.

Undirstaðan þarf þó alltaf að vera góð.  Veljið fyrst rauðvín í léttari kantinum, helst ávaxtamikið. Forðist þung vín og veljið frekar tegundir á borð við ungt Riojavín eða betri ítölsk vín. Forðist þó Merlot sem er áberandi þrúga og gæti yfirgnæft drykkinn. Ef ég ætti að mæla með einstökum tegundum hjá ÁTVR þá vil ég nefna t.d. Pasqua en frá þessum framleiðanda fást mörg góð, ódýr vín í flestum búðum þó úrvalið sé best í Heiðrúnu.

Uppskriftir af Sangrium
Hlutföllin eru einföld. U.þ.b. 1/3 rauðvín, 1/3 sterkt og 1/3 gos. Hlutföll sterku vínanna eru síðan smekksatriði. Hlutfall gostegunda fer sömuleiðis eftir smekk en þar mætti t.d. nota Sprite/7-up á móti Fanta eða Grape. Góð Sangria þarf síðan að jafna sig einhverja tugi mínútna áður en drykkurinn er tilbúinn. Munið að nota vel af klaka því volg Sangria verður aldrei jafn góð og ísköld. Hér koma svo nokkrar uppskriftir sem ég hef safnað að mér í gegn um árin:

1 lime
1 sítróna
1 appelsína
1/4 bolli sykur
1/2 bolli cognac
1 flaska rauðvín
2 matskeiðar sítrónusafi, klaki og sódavatn
Skerið ávextina í sneiðar og blandið drykkinn

1/4 bolli sykur
1 bolli vatn
1 appelsína
1 lime
2 bananar
10-20 jarðarber
melónukúlur
1 flaska rauðvín eða rósavín, klaki og sódavatn
Skerið ávextina í sneiðar og blandið drykkinn

1 flaska rauðvín
1 líter appelsínusafi
1 bolli sítrónusafi
1/2 bolli sykur
1/2 bolli cognac
1/4 bolli Cointreau
1 líter Sprite/7-up
2 appelsínur
1 sítróna
Skerið ávextina í sneiðar og blandið drykkinn

1 flaska hvítvín
1/3 bolli sykur
3/4 bolli cognac
3/4 bolli ferskjulíkjör
1/2 bolli sítrónusafi
4 ferskjur
blá og græn vínber
Skerið ávextina í sneiðar og blandið drykkinn

Eins og sjá má er „löglegt” að nota hvítvín eða rósavín í stað rauðvíns eða jafnvel að blanda dálitlu kampavíni saman við. Best þykir mér að nota rauðvín, Sprite og Fanta, appelsínulíkjöra, cognac og kaffilíkjör. Það er að lokum von mín að þið sem þetta lesið eigið eftir að eiga góðar stundir það sem eftir lifir sumars, njóta daga sem kvölda, horfa á sólarlagið, drekka Sangriu og eiga góðar stundir.

_____
Það er veisluþjónustan Cocktail sem býður upp á þennan sumarmola, allar nánari upplýsingar um Cocktail má finna á heimasíðunni www.cocktail.is

Cocktail veisluþjónusta
s. 899 8994